Gurit Pratelan

;Marang Yan Tohari

Upama Sliramu wus ngantebi dalan rumpil iki

Sawuse kabeh cuwilan kekarepan wus jinumput

Banjur sinusun kaya dene menara kudus

Dakpikir atimu ora prelu sekukuh patung-patung kuna

Jer nyatane jagad jogedan iki sansaya ciut

Lan bencong mbleret koncatan urub

Aku lan sliramu mung bisa nggetuni kunerpane guritan

Prawan ayu sing nate ngrawuhi sarashan ing taman budaya

Saiki wus murca tanpa ninggal esem apa maneh wekas

Bok menawa wis kaget ilining banyu jaman pasemon

Lan singidan ing ngisor tilam pagulingan

Dolanan srengenge sing pancen wajib direngkuh

Kamangka jogged ledhekmu isih ngleter

Sesoderan sampur sutra sing kok cipta mawi roncen gupita

Tansah kinalung manis ing manglunge jangga

Sinambi nglaras tembang lelipure ati kapang

Tumrap rasa sapletik sing kadhung wurung binalang

Nyatane rerenggan peni sing jinejer-jejer

Ora kuwagang ngosikake ati marang ancas luhur

Tatu-Tatu kabudayan iki dadi sangsaya jero

Tangis gunung lan segara sngsaya ngiris ati

Sautara sliramu lagi kekitran kelangan plung

Kalimput angin seser nyisir pulung jantung

Tanpa bisa sambat apa maneh gugat

Marang tembung arif sing mung kari lelemeran

Dadi barang eceran ing pasar dhasaran pinggir dalan

Bisa tinuku sasaran bandha gadhen

Pasemon tumrap mungkure tata karma paseduluran

Dene aku mung bisa memuji

Muga-muga guritanmu tesih ngrenggani udhiyana iki

 

Bledheg Segara Kidul, Turiyo Ragilputra