ING PONDOK INDAH MALL

Kulit pucet rambut jagung Mripat lilin mobat-mabit keterak angin Ulat sumelang kelingan tas abang Ulat sumelang kelingan lingeri nrawang Ulat sumelang kelingan kalung berlian Ulat sumelang kelingan lipstick kembang Ulat sumelang kelingan sandal Louis Vuitton Ulat sumelang kelingan gilape gelang Ulat sumelang kelingan uleng-ulengan Dhuwite plastik kadigdayane ilang Bisane mung unjal ambegan Jakarta, 2011 Dening Yusuf Susilo Hartono

Ambengan Sega Kuluban

Ambengan sega kuluban dieler  ing tampah
diladekake ing pasamuwan
direncah bebarengan, kroyokan, rebutan

Ambengan sega kuluban
ora ana sing ngerti duweke sapa
kejaba dadi pangane para wayang, para dhalang
sing lagi lungguh methingkrang
kidang lan truwelu, kinjeng lan kupu,
mung hisa nyawang sinambi ngeleg idu

Ambengan sega kuluban, wis gusis dienggo pesta
mung kari tamoah ngganda amis, angganda amis
banjur kanggo bal-balan para buta

Dening            : Turiyo Ragil Putra

Layange Rama Marang Shinta

Dakjaluk kangenmu

Shinta

Karana sabubare brubuh alengka

Para emban gupuh nambut silaning

Akrama

Sauntara slirau tansah lelewa ing antarane

Mega-mega

Wus dak pecaki dawane pesisir

Shinta

Lan terus angon menyang endi

Prau ngumbara

Awit layar panggah kumibar kasentor angin

Wengi

Kumembenge eluh ngekesake langgam

Gupitasari

Dakjaluk kangenmu

Shinta

Ayo kita langen ing taman ayodya

Bledheg Segara Kidul, Turiyo Ragilputra

Langgam Segara Wedhi

Tutna lakune onta

Nalika lintang panjer langit ngreksa kunarpa

Rembulan pucet kapatrapan pidana

Lan kumibare jubah para pangumbara

Manjilma lukisan ing kanvas wengi

Sewu jangkrik nglaras langgam berzanji

Aja dipedot lurung tumuju kraton fajar

Selagine bun isih nusoni wedhi

Ngemban sakehe panggresah lan sesanggan

Langit jingga tamaning para suhada

(sauntara angin tetep jroning sujud syahwi

Lan tanpa kendhat ngemonah sadawane wengi)

Mecaki dawane angen-angen

Ginelar kabeh babut biru-kabecikan

Lan tansah setya nganteni sang dikir ing wengi samun

Bledheg segara Kidul, Turiyo Ragilputra

Rembulan salingir

Rembulan salingir ngila ing banyu sendang

Bok menawa mentas pupuran lan bengesan

Apa wewayangane payudole

Jarik salembar ilang bathikane?

Tetes kringet pecahe riwe

Agal alus manut tembunge

Diundhuh apa digado

Dununge mung ana ing salebar suruh

Rembulan salingir rembulan kumanthil

Rembulan kumitir rembulan pinikir

Yagene mung mencok ing pang jambu

Suthik mencok ing pang atiku?

Ah, gethih iki menyang endi iline?

Sedheng jaman suthik ngowahi kodrate

Desa lan alas Liwung

Suwunge weteng lan ngelake gurun

Apa bisa adringku dibendung

Nganggo krakal kali apa dene lempung?

Rembulan salingkir ceblok ing korine ati

Larane wudel tambane pupus jati

Donga Bocah Piatu

Gusti, durung kober dakrukti jisime ibu

Sing mati kaliren ing pinggir dalan

Mati kaku merga ngrungkebi sesantine tembang kamakmuran

“iki jaman mardika. Pembangunan ginelar kanggo kamulyan para kawula”

(nanging apa urup cukup wareg mangan sesorah sedheng para pepriman isih pating slarah)

Gusti, upama aku entuk blaka

Wiwit wingi weteng iki durung klebon sega

Senajan ujaring kandha kita iki wis mardika

Pembangunan dadi program kapisan, kemakmuran

Janji manis saka kabeh pendhali lis peprentahan

“nanging apa cukup manungsa mung urip karo janji

Sedheng kacintrakan tansah mbujung urip iki?”

Gusti, najan wus dakgawa kabeh sanggan panadhang

Menyang endi kudu nglabuhake kesurange nasib

Kamakmuran iki panggah angel diranggeh

Sagagang kembang cempaka uga wus kadhung alum

Saurunge kober daksawurake ing makame ibu

Sing dadi kurban atas nasib sapahit rempelu

Bledheg Segara Kidul, Turiyo Ragilputra