Sepuluh November (gurit tema patriotisme)

( cipta karya : dina)

Embating tutur ngusapi luh
Menangi jagad wus garang garing sakjangkeppe
Ratu gung binatara lan pahlawan  gari aras ampeyan kita
Kajejeg, kaideg sarupa krema
Banyu wus emoh nyawuk
Godhong ndang emoh nyuwek
Suket uga emoh nyenggut
Janma bangsa lali pengorbananmu
Getih tumetes saka palarapanmu
Balung owah saka engselmu
Nanging sapa dhuhkita kapiyarsa November
Sakjane.. luh kacucur saka mripat suwiji
Tinimbang idu kang nglecehna dina pangingetmu
Sepuluh November..
 Tanggal kang dadi kiasan
Kongsi jambul wanen
Kabeh iku pucuk ning umuk
Pahlawan lan pangorbanane
Wus ilang kang tilas abang ning tanggalan
Batur namung elingna
Primpen bangsa kita, papar sadurunge benjut
Amarga mbuang pahlawan
Kang nuwuhake bangsa sakbiyene

Karepan Pangus (geguritan tema tresna)

Semlorot lintang kauripan
Ngelangi tresna ing samudra samudana
Kang tansah nuhuni kekarepan
Remuk rempu mripat iki
Nuduh kamesten marang sliramu
Sliramu kang ngowahi ati
Kang wolak-waliki karepan
Uga kang tenan lahang kariban manis
Maju tatu mundur kebanjur
Awak kaku tresnaku selak luntur
Agawe ati sumiblak tanpa getir kanyatan
Gumintir bledeg neng tlatah awan cahyamu
Nggreget kemesten anggone ngenteni
Nanging, kuwi namung karepan pangus
Kang ora liya saka sajroning pikirku
Asih rak namung angin kang ngulandara
Tenan, Lumaku jeritku sajroning swara
Yen tenan kuwi pangasih jejodohku,
Nanging kanyatan ngomong sakprigel atimu
Lintang.. gawanen tresna iki
Kang menclok lunyu agawe semu
Amarga deweke rak tansah ngopeni asihku